કાવ્યપુષ્પ

Wednesday, October 15, 2014

Paresh Kalasariya is still waiting for you to join Twitter...

Paresh Kalasariya is still waiting for you to join Twitter...

Accept invitation

Saturday, October 11, 2014

Paresh Kalasariya sent you an invitation

Paresh Kalasariya has invited you to join Twitter!

Accept invitation

Friday, May 8, 2009

રેગિસ્તાન (અછાંદસ) – હરેશ કાનાણી

તને
રમાડવા
તને છાનો રાખવા
બનતા હતા
ઊંટ, તો ક્યારેક ઘોડો!
પણ
અમને ક્યાં ખબર હતી કે
એ
ઊંટ કે ઘોડાને
તું
મૂકી આવીશ
બળબળતા રેગિસ્તાનમાં...!

– હરેશ કાનાણી
ગીરગઢડા (02875)43553, 9913887816

તને હું (અછાંદસ) – વસંત જોષી

છલોછલ તળાવ
મરક-મરક મલકે
પાળે તું હોય
લહેર પંપાળે પગ
ફડફડાટ ઊડે
બહુ કઠિન છે પવનને પકડવો
લટ ફંગોળે ચહેરા પર
પાળ ઊતરી
બેસે
થડના ટેકે
હસુ-હસુ તાકી રહે
અપલક આંખે
સંગોપે પાલવમાં
અસ્તિત્વનો અંશ
બ્ર્હ્માંડના દરવાજા ખોલી
એકાકાર
સદ-ચિત્ત-આનંદ
ટેરવાંનો સ્પર્શ
ઊછળે ભીતર
મરકતું તળાવ

– વસંત જોષી

Saturday, March 21, 2009

મને તું (અછાંદસ) – વસંત જોષી

એક ટપકું ગાલે કર્યુ
ખળખળ વહ્યું
આકાશ સ્વચ્છ
પંખી ઊડ્યાં
મેદાન તાકતું

એક ટપકું ઝુમખે ઝીલ્યું
નીર આછર્યાં
ફેલાયો ઝબકાર
પવન પડ્યો
ટાઢ થરથરી
હોઠ ધરાના મરક ગુલાબી
બાગના રસ્તે
ભરચક ખીલ્યા
એક ઈશારે
મહેંકી ઊઠ્યાં ખોબે-ખોબે
તરસ તૃપ્ત

એક ટપકું
ઝીલ્યું
પામ્યું

- વસંત જોષી
પ્રોગ્રામ એક્ઝિક્યુટિવ, ઓલ ઇંડિયા રેડિયો, રાજકોટ
બી-75, આલાપ સેંચ્યુરી, કાલાવાડ રોડ, રાજકોટ.
મો. 9426987882, 02812443961/62
ઇ-મેલ: vasant.b.joshi@gmail.com

ખાલી હવે (ગઝલ) – રાજેન્દ્ર શુક્લ

છલોછલ જે ભર્યું'તું તે કર્યું ખાલી હવે,
તું લંબાવે હથેલી તો દઉં તાલી હવે.

નિમંત્રણ વિણ મહેફિલમાં અહીં આવી ચડ્યો;
રજા આપી શકે જો તું જઉં ચાલી હવે.

ગયાં પર્ણો, ખર્યાં પુષ્પો, વસંતો પણ ગઈ,
અચાનક એકલી આ વેલ કૈં ફાલી હવે.

પદારથ પિંડમાં ને પિંડ આ બ્રહ્માંડમાં,
સકલ પીડાય તે લાગે ભલી વ્હાલી હવે.

મળ્યો અવસર, અમોલખ આંગણે આવી ઊભું,
અદીઠાનું અડોઅડ તે લિયો ઝાલી હવે.

- રાજેન્દ્ર શુક્લ

અવળી ચાલ (ગીત) – સંજુ વાળા

અવળી ચાલ, અજાયબ કેડા
એક જ ડગલે માપી લીધા ત્રણે કાળના છેડા.

ભાતભાતનાં ભાવભોજથી તસતસતાં તરભાણાં,
અબૂધની આગળ મૂકેલાં અઘરાં કોઈ ઉખાણાં;
ચાખે એ સહુ નાચે લઈને માથે નવ નવ બેડાં,
અવળી ચાલ અજાયબ કેડા.

ધખધખતી એક ધૂન ચડાવી લખીએ લખ સન્દેસા.
પગ થઈ જાતા પવનપાવડી, હાથ બન્યા હલ્લેસાં;
મીટઅમીટે એ જગ જોવાં, વિણ વાયક વિણ તેડાં,
અવળી ચાલ, અજાયબ કેડાં.

- સંજુ વાળા
એ-77, આલાપ એવન્યૂ, યુનિ. રોડ, રાજકોટ.
મો. 9825552781

Saturday, February 14, 2009

પ્રેમપત્ર - પરેશ કળસરિયા

મિત્રો,
HAPPY VELENTINE DAY!
વેલેંટાઇન ડે એટલે પ્રેમનું પર્વ. વળી આજે 'કાવ્યપુષ્પ'ની પ્રથમ વર્ષગાંઠ છે. અમે એક વર્ષ પહેલાં વેલેંટાઇન ડેનાં રોજ 'કાવ્યપુષ્પ' બ્લોગ ગુજરાતી સાહિત્યરસિકોનાં ચરણે ધર્યો. જેને આપ સૌએ હર્ષભેર વધાવી લીધો. તે માટે તથા સૌ સર્જકો અને ભાવકોનાં સાથ-સહકાર માટે અમે આભારી છીએ. ચાલો, આજે વેલેંટાઇન ડેની ઊજવણી એક 'પ્રેમપત્ર'થી કરીએ... - એડિટર્સ

(ઇમેજ નિહાળવા માટે તેનાં પર ક્લિક કરો, પ્લીઝ!)

- WRITE & DESIGN BY PARESH KALASARIYA

Monday, February 9, 2009

એટલે તમે (ગઝલ) – રાહી ઓધારિયા

મારાં વિચાર,મારું મનન એટલે તમે-
ને મારું મૌન, મારું કથન એટલે તમે.

હું એટલે તમારાં અરીસાનું કોઈ બિમ્બ-
ને મારી કલ્પ્નાનું ગગન એટલે તમે.

મારું કહી શકાય એવું શું રહ્યું પછી?
સ્મિત, હર્ષ, શોક, અશ્રુવહન એટલે તમે.

લ્યો, અંતે ઓગળી ગયો મારાં મહીંનો 'હું',
કે તમને પામવાની લગન એટલે તમે.

જેને ન આદિ-અંત કદી સંભવી શકે-
એવું વિયોગહીન મિલન એટલે તમે.

તમને નિહાળવાનાં પ્રયાસો રહ્યાં અફળ,
'રાહી'! અનુભવાતો પવન એટલે તમે.

- શ્રી 'રાહી' ઓધારિયા
ભાવનગર.

Saturday, February 7, 2009

The End of An Epic... (એક દંતકથાનો અંત...)

અત્યંત શોક અને ઘેરા દુઃખની લાગણી સાથે આપને આ સમાચાર આપી રહ્યા છીએ કે ગુજરાતી કાવ્યસાહિત્યનાં દંતકથા સમાન કવિ જનાબ આસિમ રાંદેરી તા. 5, ફેબ્રુઆરી, 2009નાં રોજ જન્નતનશીન થયેલ છે. જ. આસિમ રાંદેરીની 'લીલા'ને ગુજરાતી ભાષાનાં ખરાં સાહિત્યરસિકો ક્યારેય નહિ ભૂલે. વાર્તામાં કે નવલકથામાં એકાદ બે પાત્રો સર્જી લેખક પોતાનું અને પોતે સર્જેલાં પાત્રનું નામ અમર કરી ગયાંનાં ઘણાં ઉદાહરણો મળશે પણ કવિતા, ગઝલ કે નઝમમાં વાર્તાનુરૂપ કાવ્ય લખનાર જ. આસિમ રાંદેરી સિવાય કોઈ પણ શાયરનું નામ હજી સુધી સાંભળવામાં નથી આવ્યું. એમની કલમને સો-સો સલામ. ઇશ્વર તેમનાં દિવ્ય આત્માને શાંતિ અને તેમનાં કુટુંબીજનોને આ દુઃખ સહન કરવાની શક્તિ અર્પે એ જ પ્રાર્થના સહ અલ્પેશ કળસરિયાનાં નીચેનાં મુકતક વડે હ્રદયાંજલિ...
- એડિટર્સ

ગીતો અમર પ્રણયનાં રસીલા નહીં મરે,
પ્રેમી-યુગલ આ સૌથી સજીલા નહીં મરે;
દુનિયામાં જ્યાં સુધી છે મહોબ્બત, ઓ દોસ્તો!
'આસિમ' નહીં મરે અને 'લીલા' નહીં મરે!
- અલ્પેશ કળસરિયા

વૈરાગ (નઝમ) – આસિમ રાંદેરી

એજ બગીચો એજ છે માલી,
એજ ઉષા-સંધ્યાની લાલી,
કેફ છલોછલ પુષ્પની પ્યાલી
કોયલ, બુલબુલ ડાલી ડાલી,
સઘળી વસ્તુ ત્યાંની ત્યાં છે,
કિન્તુ મારી 'લીલા' ક્યાં છે?

એજ બહારો બાગની અંદર,
પ્રેમનાં જાદુ, રુપના મંતર,
એજ પતંગા દીપના ઉપર,
એજ કમળ છે એજ મધુકર
સઘળી વસ્તુ ત્યાંની ત્યાં છે,
કિન્તુ મારી 'લીલા' ક્યાં છે?

એજ ફુવારો ને ફુલવારી,
રંગબેરંગી ક્યારી ક્યારી,
મખમલ સમ આ ઘાસ-પથારી,
જે પર દિલની દુનીયા વારી!
સઘળી વસ્તુ ત્યાંની ત્યાં છે,
કિન્તુ મારી 'લીલા' ક્યાં છે?

એજ હજી છે જૂઈ-ચમેલી.
આગિયાઓની જ્યોત જડેલી,
આંબા ડાળે જુઓ પેલી;-
એજ ચકોરી ચંદા ઘેલી,
સઘળી વસ્તુ ત્યાંની ત્યાં છે,
કિન્તુ મારી 'લીલા' ક્યાં છે?

ચાંદ-સિતારા એજ ગગનમાં,
મસ્તી એની એજ પવનમાં,
તાપી પણ છે એજ વહનમાં,
એજ ઉમંગો મારા મનમાં,
સઘળી વસ્તુ ત્યાંની ત્યાં છે,
કિન્તુ મારી 'લીલા' ક્યાં છે?

'વડ' પર બંને નામ હજી છે,
થડ પર કોતર કામ હજી છે,
બે મનનું સુખધામ હજી છે,
સામે મારું ગામ હજી છે,
સઘળી વસ્તુ ત્યાંની ત્યાં છે,
કિન્તુ મારી 'લીલા' ક્યાં છે?

એજ છે રોનક તાપી તટ પર.
એજ છે સામે લીલાં ખેતર,
વર્ષાની ઝરમરમાં મનહર;-
દૂર દિસંતાં મસ્જિદ-મંદર,
સઘળી વસ્તુ ત્યાંની ત્યાં છે,
કિન્તુ મારી 'લીલા' ક્યાં છે?

'આસિમ' આજે રાણી બાગે,
ઊર્મિને કાં ઠેસ ન વાગે?
મસ્ત પવનમાં પુષ્પ-પરાગે,
કેમ મને વૈરાગ ન જાગે?
સઘળી વસ્તુ ત્યાંની ત્યાં છે,
કિન્તુ મારી 'લીલા' ક્યાં છે?

- જન્નતનશીન આસિમ રાંદેરી

Thursday, January 29, 2009

નવલિકા સ્પર્ધા

નમસ્તે, મિત્રો!
ગુજરાતી સાહિત્ય પરિષદ હંમેશાં સર્જકોની સર્જનશીલતાને જોમ પૂરું પાડતી પ્રવૃત્તિઓ કરવામાં અગ્રેસર રહ્યું છે. છેલ્લાં કેટલાંક સમયથી અલગ-અલગ શહેરોમાં ગુજરાતી સાહિત્ય પરિષદ સંચાલિત 'સર્જક-સંવાદ'નું સુંદર આયોજન થઈ રહ્યું છે. આ અનુસંધાને 'સર્જક-સવાંદ', ભાવનગર દ્વારા દર માસનાં અંતિમ રવિવારે નિયમિતપણે સર્જકોની બેઠક મળે છે. જેમાં સર્જક મિત્રો પોતાની રચનાઓ રજૂ કરે છે અને તે અંગે ચર્ચા-સંવાદ પણ થાય છે. 'કાવ્યપુષ્પ'નાં વાચકોને એ જણાવતાં આનંદ અનુભવીએ છીએ કે સર્જકોને પ્રોત્સાહિત કરવાનાં ઉમદા હેતુસર ગુજરાતી સાહિત્ય પરિષદ પરિષદ, અમદાવાદ અને 'સર્જક-સંવાદ', ભાવનગર દ્વારા એક 'નવલિકા-સ્પર્ધાનું ' આયોજન કરવામાં આવ્યું છે. સર્વે વાચક મિત્રોને સ્પર્ધામાં ભાગ લેવા 'કાવ્યપુષ્પ'નું ભાવભર્યું ઈજન.
- એડિટર્સ

Tuesday, January 13, 2009

સૂરજ (અછાંદસ) – વસંત જોષી

અગનગોળો
સફરજન ચાખ્યાનો
જીભનાં ખૂણે
ધગધગતો
શિશુ સમયે
ઘટ ઘટ ધાવતાં
ધાવણનાં ટીપામાં
પચાવી જાય
વાળમાં ફરતી
ઇચ્છા અધૂરી
તૃષાનો ઓડ્કાર
પાઈનેપલજ્યૂસની નળીમાં
સોલ્ટ સાથે અથડાય
સહજ અવાજ
ઝબકે ટેરવાં
રોમાંચિત ચહેરો
છલકે લાલ લાલ
દ્રષ્ટિનાં અરીસામાં
અગનગોળાનો સ્વાદ
જીભ ફરે
કંપે ટેરવાં
ધગધગતો પીવા
હથેળી ને હોઠ
ઝીલ્યા કરે
રતુંબડો
ધગધગતો

- વસંત જોષી
પ્રોગ્રામ એક્ઝિક્યુટિવ, ઓલ ઇંડિયા રેડિયો, રાજકોટ
બી-75, આલાપ સેંચ્યુરી, કાલાવાડ રોડ, રાજકોટ.
મો. 9426987882, 02812443961/62
ઇ-મેલ: vasant.b.joshi@gmail.com

તને સઘળુંય સાંપડશે (ગઝલ) - નીતિન વડગામા

જરા તું ઝૂક થૈ ડાળી તને સઘળુંય સાંપડશે,
પછી રાજી થશે માળી તને સઘળુંય સાંપડશે.

હશે જો ધાર એની તો જ ધાર્યું કામ કરવાની,
કલમ, કરવત ને કોદાળી તને સઘળુંય સાંપડશે.

અદબ વાળી અહીં તું સાવ ખાલી હાથ કાં ઊભો ?
દઈ દે હાથમાં તાળી તને સઘળુંય સાંપડશે.

પ્રથમ તું શાંત દરિયાનો દરજ્જો સાવ છોડી દે,
નદી થૈ જાને નખરાળી તને સઘળુંય સાંપડશે.

ઉપરછલ્લું અડકવાથી કશું પણ હાથ નહિ લાગે,
રહેશે જાત ઓગાળી તને સઘળુંય સાંપડશે.

રટણ તું રોજ કરજે હા, કદી તો પ્રેમરસ પાશે,
વરસશે સ્હેજ વનમાળી તને સઘળુંય સાંપડશે.

- નીતિન વડગામા

Saturday, January 3, 2009

સાંપડે (ગઝલ) – હાર્દિક વ્યાસ

યક્ષ વિરહીનેય કોઈ દૂત વાદળ સાંપડે
એમ મરિયમનો મને આ રિક્ત કાગળ સાંપડે

રાત આખી થર્થરે છે પીતવર્ણા પાંદડાં,
ફૂલપાંદડીએ પરોઢે સહેજ ઝાકળ સાંપડે

આભઊંચા કો'ક કિલ્લે તોપ થઈ ઝૂર્યા કરું,
ને સમયનાં મ્હેલની તો બંધ સાંકળ સાંપડે

ઉંબરો ડુંગર થયો ને માંડવો પણ કંપતો,
સાવ કોરી આંખને પણ આજ ખળખળ સાંપડે

સાદ દઈને દૂરથી આકાશ તો ઊભું રહે,
કોઈ ઝીણી ચાંચમાં પણ, કાશ! અંજળ સાંપડે!

એકસરખું દૃશ્ય જોયું મેં ફરીથી ચર્ચમાં,
ક્રોસ પર લટકી રહેલી એક અટકળ સાંપડે

- હાર્દિક વ્યાસ
'રાંદલ કૃપા', મહાદેવપુરા,
ચલાલા-365630. જિ. અમરેલી
મો. 9879135878.

Friday, November 21, 2008

કવિતા એટલે...

કવિતા એટલે...

(1) 'માણસનાં હ્રદયમાં પાંગરતું સંવેદના નામનું એવું પુષ્પ કે જેની ખુશ્બૂ જગતનાં બધાં જ માણસો અનુભવી શક્તા નથી.'

(2) 'વેદના અને સંવેદના નામનું એવું મિશ્રણ કે જે હ્રદય નામની દોણીમાં ખૂબ વલોવાય પછી માણસનાં મનોજગતમાંથી માખણરૂપે જે બહાર આવે તે કવિતા.'

- વર્ષા બારોટ
મુ. પો. ઝેરડા, તા. ડીસા.
જિ. બનાસકાંઠા વાયા: પાલનપુર
મો. 99797 47210

Sunday, March 16, 2008

SAD NEWS

OUR FATHER JIVRAJBHAI J. KALASARIYA HAS EXPIRED ON 09/03/2008. SO WE
ARE SORRY TO SAY THAT WE CAN NOT UPDATE 'KAVYPUSHP' FOR SOME DAYS.

-AUTHORS & EDITORS OF 'KAVYPUSHP':

PARESH KALASARIYA &
ALPESH KALASARIYA

Friday, March 7, 2008

હે દિલ! (મુકતક) - કિસ્મત કુરેશી

કહું ક્યાં સુધી એ રૂપનાં તડકાને ચાંદની?
હે દિલ! દિવસને હું તે કહું રાત ક્યાં સુધી?
એનાં સિતમ કરમ અને એનાં જુલમ રહમ!
હે દિલ! સનમની આવી વકીલાત ક્યાં સુધી?

-કિસ્મત કુરેશી

Thursday, March 6, 2008

ઉપકાર (મુકતક) - કિસ્મત કુરેશી

બેશરમ ભમરાથી ખુલ્લંખુલ્લા ચૂમાવું મટ્યું,
આગ પર ચડવું ને સોયે વીંધાવું મટ્યું,
કેટલો ઉપકાર છે તારો હે નિર્દય ચૂટનાર!
વણખીલી કળીઓને ફૂલીફાલી કરમાવું મટ્યું.

-કિસ્મત કુરેશી

દિશાઓ ફરી ગઈ! (ગઝલ) - ગની દહીંવાલા

તે પ્રેમ-આગ, રૂપનો જે લય કરી ગઈ,
સળગી ગયો પતંગ ને જ્યોતિ ઠરી ગઈ.

મારાં દિવસ ને રાત તો દ્રષ્ટિ છે આપની,
મુજ પર કદી ઠરી કદી મુજથી ફરી ગઈ.

શ્રધ્ધા જ મારી લઈ ગઈ મંઝિલ ઉપર મને,
રસ્તો ભૂલી ગયો તો દિશાઓ ફરી ગઈ!

હો કોટિ ધન્યવાદ વહાલી ઓ જિંદગી!
આવી વિકટ સફરને તું પૂરી કરીગઈ.

મારો વિકાસ મંદ છતાં શાનદાર છે,
દુનિયા તો જેમ તેમ બધે વિસ્તરી ગઈ.

જીવી ગયો તમારી મહોબ્બતનાં આશરે,
જૂઠી વિગત જહાનમાં સાચી ઠરી ગઈ.

છે મારું દિલ ‘ગની’, અને દુનિયાની જીભ છે,
ચીરી ગઈ કોઈ કોઈ બખિયા ભરી ગઈ.

- ગની દહીંવાલા

Sunday, March 2, 2008

હું પપ્પાનો ફ્રેન્ડ, (બાળગીત) – હસમુખ ગોવાણી

પપ્પા મારાં ભાઈબંધ ને હું પપ્પાનો ફ્રેન્ડ.
દોસ્તી એવી પાક્કી જેનો કદી ન આવે એન્ડ.

પક્ડમ્-પકડી, દોડા-દોડી, કરીએ ધીંગામસ્તી,
પપ્પા ઘોડો, છૂક-છૂક ગાડી, મમ્મી ખડ-ખડ હસતી,
મોજ પડે તો ઊંચે ઊડીએ, મોજ પડે તો લેન્ડ,
પપ્પા મારાં ભાઈબંધ ને હું પપ્પાનો ફ્રેન્ડ.

પપ્પાની બોલિંગમાં હું તો ચોગ્ગા-છગ્ગા મારું,
પપ્પા મહેનત કરે ઘણી પણ હું ના કદીએ હારું,
મારી બોલિંગમાં પપ્પાનું વાગી જાતું બેન્ડ,
પપ્પા મારાં ભાઈબંધ ને હું પપ્પાનો ફ્રેન્ડ.

પપ્પા ક્યારેક દફતર લઈને જાય નિશાળે મારી,
હું પપ્પાની ઓફિસે જઉં બેગ ઉઠાવી ભારી,
પપ્પા મારી ચડ્ડી પહેરે હું પહેરી લઉં પેન્ટ,
પપ્પા મારાં ભાઈબંધ ને હું પપ્પાનો ફ્રેન્ડ.

- શ્રી હસમુખ ગોવાણી

ધ્રાંગધ્રા.

જિ. સુરેન્દ્રનગર.
ગુજરાત.

Thursday, February 28, 2008

कुंज मे बेठा रहूं (गझल) – मिर्झा गालिब. અનુવાદ – મનસુખલાલ સાવલિયા

कुंजमे बैठा रहूं यों पर खूला
काश कि होता कफ्सका दर खूला।

જો આ પિંજરાનો દરવાજો ખૂલ્લો હોત તો હું એના એક ખૂણામાં પાંખો પસારીને બેઠો રહેત!

हम पूकारे और खूले यों कौन जाय
यार का दरवाजा पायें गर खूला।

અમે પુકારીએ અને એ ખોલે, એવો યારનો દરવાજો ખૂલ્લો હોય તો પણ કોણ જાય?

वाकई दिल पर भला लगता था दाग
जख्म लेकिन दागसे बेहतर खूला।

દિલ પ્રેમમાં દાઝ્યું હતું અને તેના ઉપર જે દાગ હતો તે સારો લાગતો હતો, પરંતુ જખ્મ તો એનાથી પણ વધારે ખૂલ્યો!

नामे के साथ आ गया पैगाम-ए-मर्ग
रह गया खत मेरी छाती पर खूला।

પત્રની સાથે જ મોતનો પયગામ આવી ગયો અને અમારી છાતી પર એ પત્ર ખૂલ્લો રહી ગયો

देखियो ‘गालिव’ से गर उलजा कोई,
है वली पोशीदा और काफिर खूला।

જોજો, કોઈ ગાલિબની હડફેટે ચડતા નહીં, એ ગુપ્ત રીતે તો વલી (મહાત્મા) છે, પણ ખૂલ્લામાં કાફર છે!

Wednesday, February 27, 2008

કમાલ છે! (ગઝલ) - અમૃત ‘ઘાયલ’

કારણ વગર પ્રહાર કરે છે, કમાલ છે!
ને પાછાં સારવાર કરે છે, કમાલ છે!

મન રાતભર વિચાર કરે છે, કમાલ છે!
પડખા ઘસી સવાર કરે છે, કમાલ છે!

છિદ્રો જ પોષવા સદા ટેવાયેલી નજર,
દર્પણ ઉપર પ્રહાર કરે છે, કમાલ છે!

અંદર અહીં જ ઘૂઘવે છે જળ નિરાંતનાં
પણ શોધ મન, બહાર કરે છે, કમાલ છે!

ઝિન્દાદિલી જુઓ કે છે અંતિમ પળો છતાં,
હસતે મુખે પસાર કરે છે, કમાલ છે!

નિજમાં સમાવી લે છે ગમે તેવી લાશ હો,
સહુની અદબ મજાર કરે છે, કમાલ છે!

બેઠો છે જાળ પાથરી ‘ઘાયલ’ સ્વયં ઉપર,
ખુદનો જ ખુદ શિકાર કરે છે, કમાલ છે!

- અમૃત ‘ઘાયલ’

Sunday, February 24, 2008

ઉમંગો, (મુક્તક) - ગની દહીંવાળા

મિત્ર! આ મારી તરફ જોઇને હસતાં પુષ્પો,
મારા ભૂતકાળનાં રંગીન પ્રસંગો તો નથી!
કૈંક કરમાઇને ક્યારીમાં પડ્યાં છે એમાં,
જોઇ લેવા દે મને મારાં ઉમંગો તો નથી!

- ગની દહીંવાળા

Saturday, February 23, 2008

(મુક્તક) - અમૃત ‘ઘાયલ’

અમૃતથી હોઠ સહુના એંઠા કરી શકું છું,
મૃત્યુના હાથ પળમાં હેઠા કરી શકું છું;
આ મારી શાયરી તો સંજીવની છે ‘ઘાયલ’,
શાયર છું, પાળિયા ને બેઠા કરી શકું છું.
- અમૃત ‘ઘાયલ’

Friday, February 22, 2008

મા, (લઘુકથા) – અલ્પેશ કળસરિયા

અમારાં ગામમાં એક ફાતેમા બહેન કરીને મુસ્લિમ સ્ત્રી રહે, ફાતેમાબહેનનું ઘર મસ્જિદને એકદમ અડીને. કહેવાતું કે ફાતેમાબહેન ગાંડા છે, નાસ્તિક છે અને મસ્જિદમાં નમાજ થાય છે ત્યારે ક્યારેક અપશ્બ્દો બરાડે છે. મને થયું કે ફાતેમા બહેન પર કવિતા લખું. એટલે હું ફાતેમાબહેનનાં ઘરે પહોંચ્યો. જોયું તો ફાતેમાબહેનનો અઢી-ત્રણ વર્ષનો સલીમ સૂતો છે. એકાએક મસ્જિદમાં નમાજ શરૂ થાય છે, “અલ્લા... હો અકબર અલ્લાહ...”. સલીમ ઝબકીને જાગી જાય છે. ફાતેમાબહેન સલીમનાં માથા પર હાથ ફેરવતા કહે છે, “સૂઈ જા, બેટા! કૈ નથી, એ તો રોજનો ઘોંઘાટ છે.” મારાથી તરત જ એમને પૂછાઈ જાય છે, “તમે મુસ્લિમ થઈને આવા નાસ્તિક કેમ છો? તમને નથી થતું કે તમારે ખુદાની બંદગી કરવી જોઈએ?” તેઓ જવાબ આપે છે, “હું નાસ્તિક નથી કે નથી હું મુસ્લિમ!”. મેં ફરી પૂછ્યું, “...તો તમે શું છો?” તેમણે તરત જ જવાબ આપ્યો, “ હું મા છું. મારાં સંતાનનું ભરણપોસણ તેની સારસંભાળ એ જ મારો ધર્મ છે, એ જ મારી બંદગી છે.

બીજાને જે કહેવું હોય તે કહે! પણ મારા માટે તો ફાતેમાબહેનનો આ જવાબ ગીતા, બાઇબલ કે કુરાનનાં ઉપદેશથી કમ નથી. ...કે ‘મા’ હિન્દુ, મુસ્લિમ કે શીખ નથી હોતી... કે ‘મા’નો કોઈ ધર્મ નથી હોતો. ‘મા’-‘મા’ છે કારણ કે ‘મા’ એટલે જ ઈશ્વર અને ઈશ્વરનો સ્વ્યં કોઈ ધર્મ નથી હોતો. મને મારી કાવ્યપંક્તિ મળી ગઈ:

નાસ્તિક નહીં હૂં, મા હૂં મૈં, ઝાહિદ! ઈમાન સે;
ઉઠ જાતે હૈ બચ્ચે મેરે શોર-એ-અઝાન સે.

- અલ્પેશ કળસરિયા
alpesh_kalasariya@yahoo.com

Thursday, February 21, 2008

(મુક્તક) - બરકત વિરાણી 'બેફામ'

કોઈ તમન્ના વિનાનાં તરંગ છે, સાકી!
પીડા વિનાનાં બધાયે પ્રસંગ છે, સાકી!
સુખી જનોના જીવનની મેં જોઈ છે મસ્તી,
નશા વિનાના મદિરાના રંગ છે, સાકી!

- બરકત વિરાણી 'બેફામ'

Wednesday, February 20, 2008

ત્રણ રૂબાઈ – મરીઝ

સૌંદર્યની દુનિયામાં છે સંયમનો રિવાજ,
સ્વભાવના બંધનનો નથી કોઈ ઈલાજ;
સમજી લે કે મોઘમ છે ઈશારા એના,
ફૂલોમાંથી ક્યાં આવે છે હસવાનો અવાજ!

-----------------------------------------

આનંદ નિરંતર નથી આલમ માટે,
દુનિયામાં કોઈ ગમ નથી કાયમ માટે;
ફરિયાદ ન કર જોઈ જગતનાં અંકુશ,
જન્નતમાંય બંધન હતાં આદમ માટે.

-----------------------------------------

પાણીમાં હરીફોની હરિફાઈ ગઈ,
શક્તિ ન હતી, અલ્પતા દેખાઈ ગઈ;
દરિયાનું માપ કાઢવા, નાદાન નદી,
ગજ એનો લઈ નીકળી, ખોવાઈ ગઈ

- મરીઝ

Tuesday, February 19, 2008

હસ્તરેખા, (મુક્તક) – અલ્પેશ કળસરિયા

આ દરિયાનો કિનારો છે, ખિલેલી લાલ સંધ્યા છે,
વિરહમાં કોઈનાં મારાં નયન અશ્રુથી ભીના છે;
લખું છું નામ એનું કે તરત ભૂંસાઈ જાયે છે,
કિનારાની આ રેતી જાણે મારી હસ્તરેખા છે!

- અલ્પેશ કળસરિયા
alpesh_kalasariya@yahoo.com

Monday, February 18, 2008

बचपन, (नज़्म) – सुदर्शन फाकिर (IMAGE)

- પેજ ડિઝાઇનિંગ બાય પરેશ કળસરિયા
pareshkalasariya@gmail.com

મિત્રો, 'આજ' ફિલ્મનું આ ગીત ખૂબ જ લોકપ્રિય છે. થોડા દિવસો પછી અલ્પેશને તે એક સ્કૂલનાં ધોરણ નવનાં બાળકોને આ ગીત ભણાવવાનું છે. આ ગીત પાઠ્યપુસ્તકમાં આવતું નથી. એટલે બાળકોને આપવા માટે આ ગીતની લેખિત કોપીની જરૂર પડી. ગીત ટાઈપ કર્યા બાદ મને તેમાં થોડા ચિત્રો ઉમેરવાનું મન થયું. અને છેવટે જે પરિણામ મળ્યું તે જોયા બાદ મને લાગ્યું કે આસપાસ મુકેલા ચિત્રોને લીધે જાણે કે ગીતનો ભાવ વધું તીવ્ર, વધુ અસકારક બને છે. તેથી આ ઇમેજ આપની સમક્ષ રજૂ કરી રહ્યો છું. આપના પ્રતિભાવો જણાવશો. આભાર. (ઇમેજ સારી રીતે જોવા તેનાં પર ક્લિક કરો. fotoprint કઢાવવા માટે વધુ સારાં રિઝોલ્યુશન વાળી ઇમેજ મેળવવા નીચેનાં મારાં એડ્રેસ પર ઇ-મેલ કરો.)

- પરેશ કળસરિયા
pareshkalasariya@gmail.com

Saturday, February 16, 2008

શોક સમાચાર

દરેક સાહિત્ય પ્રેમી માટે આઘાત અને શોકનાં સમાચાર છે. તા. 14 ફેબ્રુઆરી 2008 ની રાતે . રાજકોટ ખાતે જનાબ ઇમામુદ્દીન મુર્તુઝાખાન બાબી - ‘રૂસ્વા’ નું અવસાન થયું છે. ઈશ્વર તેમના આત્મા ને શાંતિ આપે અને તેમના કુટુંબીજનોને આ દુ:ખ સહન કરવાની શક્તિ અર્પે એ જ પ્રાર્થના.

“કૈસે બતાયે આપકો ક્યા ક્યા નહી રહા?
હોતા નહી યકીન કિ ‘રૂસ્વા’ નહી રહા!”

- પરેશ કળસરિયા

કોણ માનશે?, (ગઝલ) – ‘રૂસ્વા’ મઝલૂમી

ઇમામુદ્દીન મુર્તુઝાખાન બાબી - ‘રૂસ્વા’ મઝલૂમી

જન્મ: 11 ડિસેમ્બર, 1915 : અવસાન : 14 ફેબ્રુઆરી, 2008

સ્વ. ‘રૂસ્વા’ મઝલૂમીને તેમની જ એક ગઝલ દ્વારા ‘શબ્દાંજલિ’:

મોહતાજ ના કશાનો હતો . કોણ માનશે?
મારો ય એક જમાનો હતો. કોણ માનશે?

ડાહ્યો ગણી રહ્યું છે જગત જેને આજકાલ,
એ આપનો દિવાનો હતો કોણ માનશે?

તોબા કર્યા વિના કદી પીતો નથી શરાબ,
આ જીવ ભક્ત છાનો હતો, કોણ માનશે?

માની રહ્યો છે જેને જમાનો જીવન-મરણ,
ઝગડો એ હા ને ના નો હતો. કોણ માનશે?

હસવાનો આજે મેં જે અભિનય કર્યો હતો,
આઘાત દુર્દશાનો હતો, કોણ માનશે?

‘રૂસવા’ કે જે શરાબી મનાતો રહ્યો સદા,
માણસ બહુ મઝાનો હતો, કોણ માનશે?

- ‘રૂસ્વા’ મઝલૂમી

Friday, February 15, 2008

આંખનાં ઈશારે કરું વાત, (ગીત) – નીલેશ સેંતા

શબ્દોનાં વૈભવનો ખ્યાલ નથી સ્હેજે, હું તો આંખનાં ઈશારે કરું વાત
એક પળ ખોલું ને એક પળ મીંચું, મને નડતા ના દિવસ કે રાત

મારી હથેળીમાં રેખાઓ જાણે કે વનમાં વાસંતીનાં છોડ,
દરિયાનાં મોજાની જેમ હોય ઉછળતા હૈયામાં સતરંગી કોડ;
તોફાની વાયરામાં ઉડતો ફરું હું તો નાજુક પતંગિયાની જાત

આંખોમાં ફૂલવાડી ખિલી ઉઠે ને પછી દૃષ્ટિથી ફૂલો વેરાય,
બીડેલાં નયનોમાં આવીને શમણાંઓ ધીરે ધીરે શરમાય;
કંઈ પણ બોલું નહીં તેમ છતાં રોજ કરું શબ્દોનાં શૂરવીરને મ્હાત

- નીલેશ એ. સેંતા ભાવનગર.

મહેંકે છે અંગ-અંગ...,(મુક્તક) - પરેશ કળસરિયા

Thursday, February 14, 2008

આ હાથનો કમાલ, (ગઝલ) - પરેશ કળસરિયા

આ હાથનો કમાલ, કોઈ પૂછશો નહિ !
તલવાર છે કે ઢાલ? કોઈ પૂછશો નહિ !

જેનાં ખયાલમાં ન રહ્યો કોઈનો ખયાલ,
કોનો હતો એ ખ્યાલ? કોઈ પૂછશો નહિ !

આવ્યો વિચાર શું કે મળી ને ઢળી નજર?
એ શર્મથી છે લાલ, કોઈ પૂછશો નહિ !

જે થઈ ગયું એ થઈ ગયું ભૂલી ગયો છું હું,
તો શું થયું’તું કાલ? કોઈ પૂછશો નહિ !

જેની દરેક પળ હતી વર્ષો સમાન, એ-
વિતાવ્યા કેમ સાલ? કોઈ પૂછશો નહિ !

- પરેશ કળસરિયા
E-Mail: paresh_kalasariya@yahoo.com

એમ કહાની ઘડીએ તો, (ગઝલ)-અલ્પેશ કળસરિયા

તું નટડી છે ને હું નટ છું એમ કહાની ઘડીએ તો...
તું મેના ને હું પોપટ છું એમ કહાની ઘડીએ તો...

મારામાં તું ઘાસ બનીને કોમળ કોમળ રંગો પૂર !
પથ્થર જેવો હું બરછટ છું એમ કહાની ઘડીએ તો...

તારી છાતી ગજ-ગજ ફૂલે મારું હોવું સાર્થ બને,
તારી અંદરનો હું વટ છું એમ કહાની ઘડીએ તો...

મારામાંથી બીજ સ્વરૂપે હું જ પછી નીકળી જાઉં,
હું જીવનનું ફળ પાકટ છું એમ કહાની ઘડીએ તો...

જેનાં ઘરની બારી ખુલ્લી એનાં ઘરને ધન્ય કરું,
પ્રેમ-અમીની હું વાછટ છું એમ કહાની ઘડીએ તો...

તું મીરાં છે, તું રાધા છે, તું છે અલ્લડ ગોપી ને-
નંદનો લાલો હું નટખટ છું એમ કહાની ઘડીએ તો...

- અલ્પેશ કળસરિયા
E-Mail:
alpesh_kalasariya@yahoo.com

वो वक्त दूसरा था, (गझल) – अल्पेश कलसरिया

चाहत का आसरा था, वो वक्त दूसरा था।
सब कुछ हराभरा था, वो वक्त दूसरा था।

फूलो की रोशनी थी, खूश्बु का था उजाला;
ख्वाबो का दायरा था, वो वक्त दूसरा था।

अरमां नहीं है कोई, ना कोई आरझू है;
दिल झख्म से हरा था, वो वक्त दूसरा था।

माफी भी तुमने मांगी तो माफ ना करेंगे;
शिकवा झरा-झरा था, वो वक्त दूसरा था।

ईकरार कर के तेरे चूमे थे होठ और फिर-
सिर गोद मे धरा था, वो वक्त दूसरा था।

तेरे बिना भी अव तो मैं जी रहा हूं, दिलबर!
तुज पे कभी मरा था, वो वक्त दूसरा था।

क्यूं छांव मांगते हो पानी पिलाओ, साहब!
जब पेड यह हरा था, वो वक्त दूसरा था।

- अल्पेश कलसरिया
alpesh_kalasariya@yahoo.com

હૃદય, (ગઝલ) – નરેશ સોલંકી

ઊનાં વહે છે આંસુ ધધકતું રહે હૃદય
પંખી સમું આ રોજ ફફડતું રહે હૃદય

વંટોળ થઈને રોજ જગત ઠોકતું રહે
તૂટેલ દ્વાર જેમ ખખડતું રહે હૃદય

તેની રગોમાં પ્રેમ વહે તો બચી શકે
નહિ તો એ ડાળ જેમ બટકતું રહે હૃદય

બાળકની જેમ જિદ કરે છે એ રોજ રોજ
છોડાવું દર્દ તોય પકડતું રહે હૃદય

આવીને દ્વાર પર તો ટકોરાં કરે જરાક
ફૂલોની જેમ ખિલી ધબકતું રહે હૃદય

આવો નજીક આમ તો થાતું નથી કશું
હા, એટલું કહું કે મરકતું રહે હૃદય

- નરેશ સોલંકી
એમ.એ. પાર્ટ-2,ગુજરાતી ડિપાર્ટમેંટ, સૌરાષ્ટ્ર યુનિ., રાજકોટ.

દર્દની ભેટ, (નઝમ) – ‘શૂન્ય’ પાલનપુરી

એક દી સર્જકને આવ્યો કૈં અજબ જેવો વિચાર;
દંગ થઈ જાએ જગત એવું કરું સર્જન ધરાર!

ફૂલથી લીધી સુંવાળપ, શૂળથી લીધી ખટક,
ઓસથી ભીનાશ લીધી, બાગથી લીધી મહક.

મેરુએ આપી અડગતા, ધરતીએ ધીરજ ધરી,
વૃક્ષથી પરમાર્થ કેરી ભાવના ભેગી કરી.

બુદબુદાથી અલ્પતા, ગંભીરતા મજધારથી,
મેળવ્યો કંકાસ મીઠો મોજના સંસારથી

પ્રેમ સારસનો ઉપાડ્યો પારેવાનો ફડફડાટ,
કાગથી ચાતુર્ય લીધું, કાબરોથી કલબલાટ.

ખંત લીધી કીડીઓથી, મક્ષિકાથી શ્રમ અથાગ;
નીરથી નિર્મળતા લીધી, આગથી લીધો વિરાગ.

પંચભૂતો ભેળવી એ સર્વનું મંથન કર્યું,
એમ એક દી સર્જકે એક નારીનું સર્જન કર્યું.

દેવદુર્લભ અવનવી આ શોધ જ્યાં બીબે ઢળી,
એ દિવસથી દર્દ કેરી ભેટ દુનિયાને મળી.

-‘શૂન્ય’ પાલનપુરી

આવડત, (મુક્તક) – અલ્પેશ કળસરિયા

એવું તને હું કહેતો નથી કે મજા ન કર,
પણ આબરૂ જતી રહે એવી દશા ન કર!
એને છુપાવવાની તને આવડત ન હો,
તો, મૂર્ખ દોસ્ત મારાં! હવેથી ગુના ન કર!

- અલ્પેશ કળસરિયા
alpesh_kalasariya@yahoo.com

આનંદ સ્વર્ગનો હશે..., (તઝમીન) – અલ્પેશ કળસરિયા

(શે’ર)

કેવી મજાની પ્રેમની દીવાનગી હશે;
કે જ્યાં ‘મરીઝ’ જેવો સમજદાર પણ ગયો!

- ‘મરીઝ’

(તઝમીન) - અલ્પેશ કળસરિયા

આનંદ સ્વર્ગનો હશે ને હરઘડી હશે,
પળ-પળમાં એક નશો હશે ને બંદગી હશે,
સમજણની સીમા ત્યાં જઈને વિસ્તરી હશે,
કેવી મજાની પ્રેમની દીવાનગી હશે;
કે જ્યાં ‘મરીઝ’ જેવો સમજદાર પણ ગયો!

- અલ્પેશ કળસરિયા
alpesh_kalasariya@yahoo.com

ન સંકોચ કર..., (તઝમીન) – અલ્પેશ કળસરિયા

(શે’ર)

હવે ગાંઠ છોડી સમર્પી દે સઘળું!
હજી કાં તું તાંદુલ છુપાવ્યા કરે છે?

- નીતિન વડગામા

(તઝમીન) - અલ્પેશ કળસરિયા

ન સંકોચ કર સ્નેહ અભિવ્યક્ત કરતાં,
જે ઊર્મિથી લાવ્યો છે અર્પી દે સઘળું!
તું લાવ્યો છે તારું જીવન પોટલીમાં,
હવે ગાંઠ છોડી સમર્પી દે સઘળું!
હજી કાં તું તાંદુલ છુપાવ્યા કરે છે?

- અલ્પેશ કળસરિયા
alpesh_kalasariya@yahoo.com

હજી, (હાઈકુ) – પરેશ કળસરિયા

જો, હજી ઈસુ
ખીલે જડાયેલ છે
કૈંક ચર્ચોમાં

- પરેશ કળસરિયા
pareshkalasariya@gmail.com

વિશેષાંક, (હાઈકુ) – પરેશ કળસરિયા

હું દલિત છું,
યાદ અપાવ્યું ફરી
આ વિશેષાંકે

- પરેશ કળસરિયા
pareshkalasariya@gmail.com

કવિતા એટ્લે...

મિત્રો! આ વિભાગ દ્વારા અલગ-અલગ વ્યક્તિઓની કવિતાની વ્યાખ્યા શું હોઈ શકે? તે જાણવાનો અને માણવાનો એક પ્રયાસ છે. આશા રાખીએ કે સૌને ગમશે. અહીં નમુના રૂપે એક વ્યાખ્યા આપી છે. આપની કવિતા અંગેની વ્યાખ્યા આ વિભાગમાં ઉમેરવા નીચે comments પર ક્લિક કરી (વધુમાં વધુ 100 શબ્દોમાં) તમારી વ્યાખ્યા લખો અથવા 'કવિતા એટલે...' સબ્જેક્ટ રાખી kavypushp@gmail.com પર ઈ-મેઇલ કરો.

કવિતા એટલે...

'આનન્દ' ફિલ્મમાં રાજેશ ખન્ના દર્દી અને અમિતાભ બ્ચ્ચન ડોક્ટરનાં પાત્રમાં છે. આનન્દ સમગ્ર ફિલ્મ દરમિયાન અનેક વાર ડોક્ટરને, 'બાબુમોશાય'! કહીને સંબોધે છે. દર્દી અને ડોક્ટર વચ્ચેની ગાઢ મિત્રતા ય મૃત્યુને ખાળી શકતી નથી. મૃત્યુ પથારી પર પડેલો આનન્દ છેલ્લા શ્વાસ લઈ આંખો મીંચી દે છે. બધા શોકથી સ્ત્બ્ધ થઈ બેઠાં છે. અચાનક આનન્દનો અવાજ સંભળાય છે, 'બાબુમોશાય'! ઘડીભર સૌને લાગે છે જાણે આનન્દ હજી જીવે છે. પણ અફસોસ સદા નાટકોથી સૌને પરેશાન કરતો આનન્દ આ વખતે નાટક નથી કરી રહ્યો. તે અવાજ તો થોડાં સમય પહેલાં શરૂ કરેલ અને શરૂ જ રહી ગયેલ ટેપ-રેકોર્ડરનો હોય છે. આ છેલ્લી વખત ટેપ-રેકોર્ડર પર સંભળાયેલો 'બાબુમોશાય' શબ્દ એટલે કવિતા.

- પરેશ કળસરિયા

ABOUT - 'કાવ્યપુષ્પ

સુસ્વાગતમ્

'કાવ્યપુષ્પ' પર આપનું સ્વાગત છે. 'કાવ્યપુષ્પ' એ ગુજરાતીઓનો, ગુજરાતીઓ વડે, ગુજરાતીઓ માટે કાર્યરત બ્લોગ છે. 'કાવ્યપુષ્પ'ની વિશેષતા એ છે કે આ એક ડેઇલી અપડેટેડ બ્લોગ છે. 'કાવ્યપુષ્પ' આપની સમક્ષ રજૂ કરે છે ગુજરાતી ગઝલ, ગીત, મુક્તક, નઝમ, સોનેટ, તઝમીન, છૂટા શેર વગેરે જેવા અનેક કાવ્યપ્રકારો, તેમ જ ગુજરાતી ગદ્ય સાહિત્ય: ટુંકી વાર્તા, નવલિકા, આસ્વાદ, વિવેચન, રત્નકણિકાઓ, વગેરે રચનાઓનો વિપુલ ખજાનો. વળી ગુજરાતીઓ દ્વારા રચાયેલ ઉર્દૂ-હિન્દી પદ્ય પણ ખરું જ. અને બીજું ઘણું બધું...! 'કાવ્યપુષ્પ' નો ઉદ્દેશ દરેક ગુજરાતીને અભિવ્યક્તિનું માધ્યમ પૂરું પાડવાનો છે. ‘કાવ્યપુષ્પ’ પર આપ દ્વારા મોકલવામાં આવેલ ઉત્તમ સાહિત્યિક કૃતિઓ અચૂક પ્રકાશિત કરવામાં આવશે.

-EDITOR

પરેશ કળસરિયા અને અલ્પેશ કળસરિયા

કૃતિ ક્યાં મોકલવી?
'કાવ્યપુષ્પ' માટે આપની કૃતિઓ આ એડ્રેસ પર મોકલશો:

ઈ-મેઇલ એડ્રેસ:
kavypushp@gmail.com

પોસ્ટલ એડ્રેસ:
PARESH KALASARIYA
C-84, ‘SHREEJI KRUPA’,
STREET BEHIND LAKHUBHAI HALL,
KAALIYABID,
BHAVNAGAR-364002.
GUJARAT.
INDIA.

MO. 9427244722,9974355615.

ABOUT AUTHOURS END EDITORS

PARESH KALASARIYA

ALPESH KALASARIYA

NAMASTE!

WELCOME, ON 'KAVYPUSHP'!

PARESH KALASARIYA FROM BHAVNAGAR(KALAA NAGARI), GUJARAT, INDIA. AGE 26 YEARS. B. SC.(MATHEMATICS) & ALPESH KALASARIYA FROM RAJKOT, GUJRAT, INDIA. AGE 24 YEARS. M.A. (GUJARATI).

WE ARE BROTHERS. BOTH OF WE WRITE GHAZALS, GITS, NAZAMS, MUKTAK, TAZMIN, SHORT STORIES, ASWAD,ETC. WE BELIVE THAT EVERY PERSON HAS SOMETHING TO SHARE. SO WE START THIS BLOG.